သမ္မာတရားကို အဘယ်ကြောင့် ရှာဖွေရပါသနည်း
ယေရှုကို ကိုးစားသူ - ဒီစီ တော့
ဘာသာပြန် - KiM
သူတို့ ဒီမှာ
ထိုအခါ တပည့်တော်တို့နှင့် ပရိသတ်များကို ခေါ်တော်မူပြီးလျှင်၊ အကြင်သူသည် ငါ၌ဆည်းကပ်ခြင်းငှာ အလိုရှိ၏။ ထိုသူသည် ကိုယ်ကိုကိုယ် ငြင်းပယ်ရမည်။ ကိုယ်လက်ဝါးကပ်တိုင်ကို ထမ်း၍ ငါ့နောက်သို့ လိုက်ရမည်။ အကြင်သူသည် မိမိအသက်ကို ကယ်ဆယ်ခြင်းငှာ အလိုရှိ၏။ ထိုသူသည် အသက်ရှုံးလိမ့်မည်။ အကြင်သူသည် ငါ့ကြောင့်လည်းကောင်း၊ ဧဝံဂေလိတရားကြောင့်လည်းကောင်း အသက်ရှုံး၏။ ထိုသူသည် မိမိအသက်ကို ကယ်ဆယ်လိမ့်မည်။ (ရှင်မာကု ခရစ်ဝင်ကျမ်း ၈း၃၄-၃၅)
“မရူးစမ်းပါနဲ့ ယောသပ်ရ။ ဒီလူက လူသတ်သမား။ သူလျှို။ ငါတို့ဆီကိုလာပြီး သတေဖန်ကိုလုပ်သလိုမျိုး နာမည်စာရင်းလာ ကောက်မယ်။ ယေရှုနာမကိုသုံးပြီး တရားဟောတဲ့သူတိုင်းကို တရားစီရင်ဖို့ ကောင်စီကို စာရင်းသွားပေးမယ်။ ခရစ်ယာန်တိုင်းကို နှိပ်ကွပ်ဖို့ ဝန်မလေးတဲ့သူမျိုး။ ဘာပဲဖြစ်ဖြစ် သူ့ကို ဒီနေရာကို လာခွင့်မပြုနဲ့...။ ညီအစ်ကို ဗာနဗ၊ မင်းမှာ စိတ်နှလုံးကောင်းရှိတာကို သိပါတယ်။ ဒါပေမယ့် ဒီကိစ္စမှာတော့ ကိုယ့်ကိုယ်ကို ကာကွယ်ရမယ့်ကိစ္စကိုတော့ မျက်စိလျင်လျင်နဲ့ ကြည့်တတ်ရမယ်။ ဒီရိပ်မြုံကို ရှောလုခြေချခွင့် မပြုပေးနိုင်ဘူး။ ညီအစ်ကိုပေတရု၊ ဒီကိစ္စမှာ ခင်ဗျားရဲ့ ဦးဆောင်မှုကို နာခံပါ့မယ်။ ကျွန်တော်တို့ဆီကို မလိုလားအပ်တဲ့ ပြဿနာ မကြုံရလေအောင် ဗာနဗကို ပြောကူပေးပါ။”
ပေတရုသည် ယောသပ်ဘက်ကို ခေါင်းငဲ့လိုက်သည်။ ပထမဆုံးသော အသင်းတော်၏ သင်းဝင်များက ယောသပ်ကို ညီအစ်ကိုများအား အမြဲတမ်း တိုက်တွန်းအားပေးတတ်သောကြောင့် “နှစ်သိမ့်စေသူ” ဟု အမည်ပေးထားကြသည်။ ဗာနဗသည် ရှောလုကို လက်ခံခြင်းမပြုရန် အဆိုသွင်းလာသော စကားများကြောင့် စိတ်မသက်မသာ ဖြစ်နေသော်လည်း ရှောလုနှင့် ပတ်သက်သော သူ၏ ထင်မြင်ချက်ကို ဖွင့်ပြောရန် လိုအပ်နေကြောင်းကို ပေတရု သဘောပေါက်လေသည်။ "ညီအစ်ကိုဗာနဗ၊ နောက်ထပ် ပြောစရာတွေ ရှိသေးလား။"
"ကျွန်တော့်ဘဝမှာ ယေရှုကို မိမိရဲ့ ကယ်တင်ပိုင်ရှင်အဖြစ် ယုံကြည်လက်ခံခြင်းကြောင့် ဖြစ်ပေါ်လာတဲ့ ဝိညာဉ်ရေးရာ အပြောင်းအလဲကို ကောင်းကောင်းကြီး သဘောပေါက်ပါတယ်။ ညီအစ်ကိုပေတရု၊ ခင်ဗျားကြုံရတဲ့ အတွင်းဝိညာဉ် ပြောင်းလဲခြင်းကို ကျွန်တော်သိပါတယ်။ ညီအစ်ကိုဣဇက်၊ ခင်ဗျားရဲ့ ဘဝမှာရော၊ ဒီနေ့ ဒီနေရာမှာရှိတဲ့ ကျန်တဲ့ယုံကြည်သူတွေရဲ့ ဘဝမှာပါ ဖြစ်ပေါ်လာတဲ့ အတွင်းဝိညာဉ်ရေးရာ အပြောင်းအလဲ ဖြစ်တဲ့ကိစ္စကို ကျွန်တော် အသေအချာသိပါတယ်။ ယေရှုနာမကို အသုံးပြုရင် ဝိညာဉ်ကယ်တင်ခြင်း ရမယ်လို့ ခရစ်တော်ကိုယ်တိုင် သွန်သင်ခဲ့တယ်မလား။ ရှောလုက ဒမာသက်မြို့ကို သွားတဲ့လမ်းမှာ ထမြောက်တော်မူတဲ့ ယေရှုခရစ်နဲ့ တွေ့ဆုံခဲ့တယ်။ ယေရှုနာမကိုလည်း တိုင်တည်ခဲ့တယ်။ သတေဖန်ကို ကျောက်ခဲနဲ့ ပစ်ပေါက်ကြသူတွေရဲ့ အဝတ်ကို ကျွန်တော်တို့ ဘာမှမတတ်နိုင်ဘဲ ဒီတိုင်းရပ်ကြည့်နေရတဲ့ချိန်မှာ အဝတ်ကို ကိုင်ပေးတဲ့သူကို ကျွန်တော် ကောင်းကောင်းကြီးသိတယ်။ ယေရှုဟာ မေရှိယဖြစ်ကြောင်း ဒမာသက်မြို့က ဂျူး၊ ဂရိတွေနဲ့အပြိုင် ဆွေးနွေးငြင်းခုံတဲ့သူကို ကျွန်တော်သိတယ်။ အပြင်ပန်းကတော့ အကျင့်သီလကို စောင့်စည်းရတဲ့ ဂျူး(လူဟောင်း)ပါ။ ရှောလုဟာ ညှဉ်းပန်းနှိပ်စက်သူ မဟုတ်တော့ပါဘူး။ အတွင်းသဘောမှာ လူသစ်ဖြစ်နေပါပြီ။ ခရစ်တော်၌ ညီအစ်ကိုဖြစ်နေပါပြီ။ အမှန်တော့ ရှောလုဟာ သူ့ရဲ့ သက်သေခံချက်နဲ့အတူ ခရစ်တော်အကြောင်းကို ရဲရဲရင့်ရင့် ဟောကြားတာကြောင့် မလိုလားအပ်တဲ့ အန္တရာယ်ကို စိုးရိမ်ရလို့ ဒမာသက်မြို့ကနေ ထွက်ခွာရခြင်းသာ ဖြစ်ပါတယ်။ ကျွန်တော်တို့က ဇာတိသဘောထားကို မကျော်လွန်နိုင်ဘဲ ယေရှုက ရှောလုနှလုံးသားကို ဒမာသက်မြို့မှာ ပြောင်းလဲပေးခဲ့တာကိုမှ လက်မခံနိုင်ဘူးဆိုရင် ယေရှုရဲ့ အသေခံခြင်းနဲ့ သတေဖန်ရဲ့ ခွင့်လွှတ်ခြင်းက ဘာအကျိုးရှိတော့မှာလဲ"
အခန်းထဲမှာ တဒင်္ဂမျှ တိတ်ဆိတ်သွားပြီးနောက် ပေတရုက အားလုံးကိုယ်စား စကားဆိုလိုက်ပါသည်။ "ညီအစ်ကိုဗာနဗ၊ မင်းရဲ့စကားတွေက အမြဲတမ်း ငါ့နှလုံးသားတည့်တည့်ကို လာထိပါတယ်။ သူ့နာမကို တိုင်တည်ပြီး မိဿဟာရပြုတာကို ငြင်းဆန်မှာမဟုတ်ဘူးလို့ ယေရှုကိုယ်တိုင်မိန့်ခဲ့တဲ့အတိုင်း မင်းတို့အနေနဲ့ ရှောလုကို ငြင်းဆန်ဝံ့ကြလား။”
ပေတရုသည် ဘေးဘီဝဲယာကို ကြည့်လိုက်ချိန်တွင် မည်သူတစ်ဦးတယောက်မျှ သူနှင့်မျက်လုံးချင်း မဆိုင်ကြသော်လည်း သူ၏သဘောထားကိုမူ သဘောတူပါကြောင်း ခေါင်းညိတ်ကာ ထောက်ခံကြလေသည်။ ယေရှု၏ မိန့်မှာချက်ကို ငြင်းဆန်ခြင်းသည် အသက်အန္တရာယ် ခြိမ်းခြောက်ခြင်းထက် ပို၍ အန္တရာယ်ကြီးမားကြောင်းကို ကောင်းစွာ သဘောပေါက်ကြလေသည်။
ဗာနဗ၏ အဆိုအတိုင်းပင် ပေါလုဖြစ်လာမည့် ရှောလုကို "တိုက်တွန်းခွန်အားပေးသူ" ဗာနဗက ဂျေရုရှလင်ရှိ အသင်းတော်၏ ညီအစ်ကိုတစ်ဦးအဖြစ် စ၍လက်ခံလေသည်။
ထို့နောက်တွင် ဗာနဗသည် ရှောလုနှင့်အတူ သာသနာခရီးထွက်ကာ တိုက်တွန်းခွန်အားပေးခြင်းအမှုကို ဆက်လက် လုပ်ဆောင်လေသည်။ ရှုရိပြည်၊ အန္တိအုတ်မြို့တွင် ခရစ်တော်၏ ကယ်တင်ခြင်း၊ ရှင်ပြန်ထမြောက်ခြင်းအကြောင်းကို သွန်သင်ဆွေးနွေးကြရာ ခရစ်တော်ကို ယုံကြည်လက်ခံသူများအနေဖြင့် အန္တိအုတ်မြို့ရှိ အသင်းတော်၏ သင်းဝင်များသည် သူတို့ကိုယ်သူတို့ "ကနဦး ခရစ်ယာန်၊ ခရစ်တော်ကို မေရှိယအဖြစ် သက်ဝင်ယုံကြည်သူ” ဟု စတင်ခေါ်ဝေါ်လာကြသည်။ ရှင်ပေါလုသည် ဂျေရုရှလင်ရှိ ညီအစ်ကိုများကို ခရစ်ယာန်ဘာသာသည် ဂျူးဘာသာ၏ ဂိုဏ်းခွဲတစ်ခုအဖြစ် ဓမ္မဟောင်းကျမ်း၏ ပညတ်ချက်တိုင်းကို လိုက်နာကျင့်ကြံပြီး ယေရှုခရစ်ကို ထပ်မံဖြည့်စွက်ခြင်းသာ မဟုတ်ဘဲ ယေရှုသည် ဘုရားသခင်နှင့် တစ်လုံးတဝတည်းရှိ၍ ဂျူးတို့၏ ပဋိညာဉ်ဟောင်းကို ခရစ်တော်အားဖြင့် ပဋိညာဉ်သစ်အဖြစ် ပြောင်းလဲခြင်းဖြစ်ကြောင်း၊ ယေရှု၏ အသေခံခြင်းနှင့် ရှင်ပြန်ထမြောက်ခြင်းအားဖြင့် ဖြစ်ပေါ်လာသော ဝိညာဉ်တော်၌ အသက်ရှင်ခြင်းတွင် ပညတ်တရားကို ကျော်လွန်သည့် အသက်တာသို့ ပြောင်းလဲခြင်းဖြစ်ကြောင်း နားချရန် ဂျေရုရှလင်သို့ ပြန်လာချိန်တွင်လည်း ဗာနဗသည် အားပေးထောက်မလေသည်။
ဗာနဗသည် အပြောအဟောကောင်းသူဖြစ်ပြီး စိတ်အားထက်သန်မှုရှိသောကြောင့် ပေါလုထက် ဦးစားပေး ရွေးချယ်ခံရသော်လည်း ဘုရားသခင်သည် ပေါလုကို ဦးစားပေး ခေါ်ဆောင်သောအခါတွင် ညည်းညူခြင်းမရှိဘဲ ကျရာနေရာတွင် ဘုရားအမှုတော်ကို ထမ်းရွက်လေသည်။ ဗာနဗသည် ရာထူးအရိုက်အရာထက် ပေါလု၏ဘဝတွင် ဘုရားသခင်၏ မဟာစေခိုင်းချက် ပြည့်စုံလာခြင်းကို မြင်တွေ့ခွင့်ရရန်သာ စိတ်စောနေလေသည်။
ဗာနဗ၏တူဖြစ်သူ ယောဟန် မာကုသည် ပထမဆုံး သာသနာပြုခရီးစဉ်တွင် အခက်အခဲ၊ အဆင်မပြေမှုများလာသောအခါတွင် ပေါလုနှင့်ဗာနဗကို စွန့်ခွာခဲ့သော်လည်း နောင်တရပြီး ဒုတိယခရီးစဉ်တွင် ပြန်လည်လိုက်ပါခွင့်ပြုရန် တောင်းဆိုရာတွင် ပေါလုသည် လက်မခံသော်လည်း ဗာနဗသည် ဂျေရုရှလင်ရှိ ညီအစ်ကိုများရှေ့တွင် ပေါလုကို ဆုပ်ကိုင်ခဲ့သကဲ့သို့ ယောဟန် မာကုကို ဆက်လက် ဆုပ်ကိုင်ထားလေသည်။ ဆက်လက်ဖက်တွယ် လေသည်။
ထို့ကြောင့်လည်း ဗာနဗနှင့်ပေါလုသည် သာသနာလုပ်ငန်းကို မတူညီသော လမ်းကြောင်းဖြင့် အစေခံကြလေသည်။ ပေါလုသည် သိလနှင့်အတူ ရှုရိပြည်နှင့် ကိလိကိပြည်သို့ ဦးတည်ပြီး၊ ဗာနဗနှင့် ယောဟန်မာကုသည် ကုပရုကျွန်းသို့ ကြွချီသည်။ ဆက်လက်၍ ဗာနဗသည် ယောဟန်မာကုကို ပေတရုနှင့်အတူ သာသနာခရီးထွက်ရန် တိုက်တွန်းအားပေးခဲ့သေးသည်။
ကုပရုကျွန်းသားဖြစ်သော ဗာနဗသည် ထိုနေရာ၌ပင် အခြေချကာ ခရစ်တော်အကြောင်းကို ဟောပြောသွန်သင်နေလေသည်။ ဗာနဗ၏ သွန်သင်ချက်အတိုင်း လိုက်နာကျင့်ကြံသူများမှာ တဖြည်းဖြည်း များလာသောကြောင့် ဂျူးနတ်ဆရာတစ်ဦးနှင့် အချင်းများရသည်။ ဗာနဗ၏ သွန်သင်ဟောပြောချက်များသည် မှော်အတတ်ကို မကြောက်ရွံ့စေခြင်းကြောင့် နတ်ဝင်သည်မှာ လုပ်ငန်းမတွင်ကျယ်တော့ဘဲ နောက်လိုက်နောက်ပါများ ဆုံးရှုံးနေတော့သည်။ ထို့ကြောင့်လည်း ခရစ်ယာန်မဟုတ်သူများကို ဗာနဗအား ဆန့်ကျင်ရန် စည်းရုံးလှုံ့ဆော်တော့သည်။ ဤသို့နှင့် ဗာနဗအား မမှန်သော စွပ်စွဲချက်တစ်ခုဖြင့် တရားစွဲဆိုကာ ဖမ်းဆီးထောင်ချခိုင်းတော့သည်။
ဗာနဗကို တရားသူကြီးက အပြစ်ကင်းကြောင်း သိရှိပြီး လွှတ်ပေးမည်ကို စိုးရိမ်သောကြောင့် ဂျူးနတ်ဆရာနှင့် အပေါင်းအပါများသည် ထောင်ကို စီးနင်းဝင်ရောက်ပြီး ဗာနဗ၏ လည်ပင်းတွင် ကြိုးပတ်ကာ မြို့ပြင်သို့ တရစပ်ဆွဲ၍ မီးရှို့သတ်ဖြတ်ကြလေသည်။
အပိုင်း (၆) ဆက်ရန်
