သမ္မာတရားကို အဘယ်ကြောင့် ရှာဖွေရပါသနည်း
ယေရှုကို ကိုးစားသူ - ဒီစီ တော့
ဘာသာပြန် - KiM
ရောမပြည်ကို အုပ်စိုးသော ဆယ်ကြိမ်မြောက်နှင့် နောက်ဆုံးဧကရာဇ်ဖြစ်သော ဒိုင်အိုကလေရှန် နှင့် မက်ဇီမီယန်တို့ အုပ်စိုးချိန်တွင် ခရစ်ယာန်များကို ပြင်းထန်စွာ ညှဉ်းဆဲနှိပ်စက်မှုကြီး ဖြစ်ပွားလေသည်။ ထိုကာလတွင် ဂုဏ်သိက္ခာနှင့် ရဲစွမ်းသတ္တိကို လေးမြတ်သည့် အရာရှိတဦးသည် ခရစ်ယာန်များကို နှိမ်နင်းရာတွင် ရောမပြည်၏ ညွှန်ကြားချက်အတိုင်း လိုက်နာသောကြောင့် ဖိနှိပ်ညှင်းဆဲမှုမှာ ထိရောက်အောင်မြင်၍ ထင်ပေါ်ကျော်ကြားလေသည်။ ထိုပုဂ္ဂိုလ်မှာ စစ်တိုက်ရာတွင်လည်းကောင်း၊ ခရစ်ယာန်များကို ဖိနှိပ်ရာတွင်လည်းကောင်း ကျွမ်းကျင်မှုရှိသောကြောင့် ချီးမြှင့်မြှောက်စားခြင်းကို ခံရလေသည်။
တနေ့သောအခါတွင် ခရစ်ယာန်များကို နှိပ်စက်ညှဉ်းပန်းရာတွင် စိတ်အားထက်သန်လေ့ရှိသည့် အေဒရီယန်သည် သောကရောက်ရလေသည်။ နာကျင်မှုခြင်း ဆင်းရဲဒုက္ခနှင့် သေခြင်းတရားကို ရင်ဆိုင်နေရချိန်တွင်ပင် ခရစ်ယာန်များသည် သူတို့၏ အရှင်သခင်ကိုသာ သစ္စာစောင့်သိ၍ ငြိမ်သက်ခြင်းကို ရရှိခံစားလျက် ရှိနေသည်။ ဤတွင် အေဒရီယန်သည် စစ်ပွဲတိုင်းတွင် မြင်ရလေ့ရှိသော ရဲစွမ်းသတ္တိထက် ကြီးမြတ်သော ခွန်အားဗလကို မြင်တွေ့လိုက်လေသည်။
ထိုအဖြစ်အပျက်က အေဒရီယန်၏ စိတ်နှလုံးကို တို့ထိသွားလေသည်။ တနေ့တွင် ခရစ်ယာန်များကို စီရင်ချက်ချမည့် တရားသူကြီးထံသွားကာ လူအုပ်ထဲမှတဦးကို "အခုလိုမျိုး ဆင်းရဲဒုက္ခတွေ ခံစားနေရတဲ့ ကြားကနေ ဘယ်အရာကများ ခင်ဗျားတို့ကို ရဲစွမ်းသတ္တိနဲ့ ဝမ်းမြောက်ခြင်းကို ပေးနိုင်ရတာလဲ။" ဟူ၍ မေးခွန်းထုတ်လိုက်သည်။ "အကျွန်ုပ်တို့ ယုံကြည်ကိုးစားသော အရှင်ယေရှုခရစ်တော်က အဲဒီအရာတွေကို ပေးစွမ်းပါတယ်"ဟု စီရင်ချက်ချခံရမယ့်သူတဦးက ရိုးသားစွာ ပြန်လည်ဖြေကြားသည်။
အေဒရီယန်အနေဖြင့် ရုတ်တရက်ဆိုပင် တကြိမ်မျှ မမြင်ဖူးသည့် အရာကို မြင်တွေ့လိုက်ရသောကြောင့် အံ့ဩတုန်လှုပ်လေသည်။ ရောမများကို ကာကွယ်စောင့်ရှောက်နေသော နတ်ဘုရားများသည်ပင်လျှင် ဤသို့သော ရဲစွမ်းသတ္တိ၊ ခွန်အားမျိုးကို ပေးအပ်နိုင်စွမ်း မရှိချေ။ ယခုတွင် စီရင်ချက်ချခံရမည့် ခရစ်ယာန်များ ကိုးကွယ်သော ဘုရားသခင်နှင့် နှိုင်းစာလျှင် ရောမနတ်ဘုရားများမှာ အရာမဝင်တော့ပါချေ။
အေဒရီယန်သည် ချက်ချင်းဆိုသလိုပင် တန်းစီထားသော အကျဉ်းသားများ၏ ရှေ့ဆုံးသို့ သွားကာ တရားသူကြီးရှေ့၌ ရပ်လိုက်သည်။ "ကျွန်ုပ်ရဲ့ နာမည်ကိုလည်း အပြစ်ပေးခံရမယ့်စာရင်းထဲမှာ ထည့်လိုက်ပါ။ ကျွန်ုပ်လည်း ခရစ်ယာန် ဖြစ်သွားပါပြီ။" ထိုအချိန်တွင် ဧကရာဇ် ဒိုင်အိုကလေရှန်နှင့် တွဲဖက်ဧကရာဇ်အဖြစ် အမှုထမ်းနေသည့် သားတော် ဂါလေယုသည် စီရင်ခြင်းလုပ်ငန်းတွင် တက်ကြွစွာ ပါဝင်လျက်ရှိနေလေသည်။ ဂါလေယုသည် အေဒရီယန်အား ခရစ်ယာန်အဖြစ်မှ ပယ်ဖျက်ရန်နှင့် သူ၏ ယုံကြည်ချက်အတွက် ခွင့်လွှတ်ပေးရန်နှင့် တောင်းပန်စကားဆိုရန် တိုက်တွန်းသော်လည်း အေဒရီယန်အနေဖြင့် လက်ခံခြင်းမပြုပေ။ အေဒရီယန်အနေဖြင့် ရူးသွားခြင်း မဟုတ်ဘဲ မိမိ၏ ယုံကြည်ချက်အတိုင်း ပြုမူခြင်းသာဖြစ်ကြောင်း ဂါလေယုကို ပန်ကြားလေသည်။
အေဒရီယန် မသိသည်မှာ ဇနီးသည် နာတာလီယာသည် လျှို့ဝှက်စွာဖြင့် ခရစ်ယာန် ဖြစ်နေသည်မှာ အတန်ကြာပြီဖြစ်သည်။ နာတာလီယာသည် အေဒရီယန်အတွက် အမြဲစဉ် ဆုတောင်းပေးနေလေသည်။ ယခုတွင် နာတာလီယာသည် အကျဉ်းချခံရသော ခင်ပွန်းသည်ကို ကယ်တင်ခြင်းတရားနှင့် သူချစ်မြတ်နိုးသော ဘုရားသခင်အကြောင်းကို ဝေငှသက်သေခံကာ အားပေးနှစ်သိမ့်နေလေသည်။
အေဒရီယန်အမည်ဖြင့် စာရင်းသွင်းထားသော ခရစ်ယာန်စာရင်းကို မကြာမီတွင် သေဒဏ်စီရင်ချက် ချတော့မည်ဖြစ်သည်။ စီရင်ခြင်း မတိုင်မီတွင် မင်းမှုထမ်းဟောင်းတဦး ဖြစ်ဖူးသောကြောင့် နောက်ဆုံးအကြိမ် ဇနီးသည်နှင့် တွေ့ဆုံခွင့်ပြုလေသည်။ အေဒရီယန်သည် အိမ်တံခါးဝသို့ လျှောက်လာချိန်တွင် နာတာလီယာသည် ခင်ပွန်းသည်ကို သေဒဏ်မှ လွတ်မြောက်လို၍ ခရစ်တော်ကို စွန့်လွှတ်လိုက်သည်ဟု မှတ်ထင်နေသည်။ ထို့ကြောင့်လည်း အိမ်တွင်းသို့ အဝင်မခံပေ။
အေဒရီယန်အနေဖြင့် ထွက်ပြေးနိုင်သော်လည်း စီရင်ခြင်းအမှုကိုသာ ထိပ်တိုက်ရင်ဆိုင်လေသည်။ အကျဉ်းထောင်သို့ ပြန်ရောက်ချိန်တွင် ခရစ်ယာန်များမှာ ညှင်းပန်းနှိပ်စက်မှုဒဏ်ကို အလူးအလဲ ခံနေကြရသည်ကို မြင်တွေ့ရလေသည်။ လက်နှင့်ခြေကို ရောမတူများဖြင့် ရိုက်ချိုးကြလေသည်။ နှိပ်စက်ခံရသူများမှာ ဒဏ်ရာပြင်းထန်၍ သွေးထွက်လွန်ကာ သေဆုံးကုန်ကြသည်။ အေဒရီယန်အလှည့်ရောက်ချိန်တွင် ဇနီးသည်မှာ အေဒရီယန်အနေဖြင့် စိတ်အားငယ်၍ ခရစ်တော်ကို စွန့်ပယ်မိမည်ကို စိုးရွံ့မိလေသည်။ သို့သော် အေဒရီယန်သည် ခရစ်ယာန်များသာ ပိုင်ဆိုင်သည့် အစွမ်းသတ္တိဖြင့် ဆုံးခန်းတိုင်အောင် ရှင်သန်သွားလေသည်။ အေဒရီယန်အား တူဖြင့် ရိုက်နှပ်ချိန်တွင် နာတာလီယာသည် ခင်ပွန်းသည်၏ လက်နှင့် ခြေထောက်များကို တင်းတင်းကြပ် ဆုပ်ကိုင်ထားလေသည်။ နောက်ဆုံးတွင် အေဒရီယန်သည် ခရစ်ယာန်အားလုံးနှင့်အတူ အသက်စွန့်သွားလေပြီ။
မာတုရများ၏ ရုပ်ကလာပ်ကို မီးရှို့ရန် စတင်ချိန်တွင် ရုတ်တရက်ဆိုသလိုပင် မုန်တိုင်းကျကာ မွှေးထားသော မီးများမှာလည်း ငြိမ်းသွားလေသည်။ ကွပ်မျက်သူအချို့မှာလည်း မုန်တိုင်းကြားတွင် သေဆုံးကုန်သည်။ ထို့ကြောင့် မီးရှို့မည့် အစီအစဉ်ကို ဖျက်သိမ်းကာ ရုပ်အလောင်းများကို မိသားစုဝင်များထံ ပြန်လည် အပ်နှံကြသည်။ အေဒရီယန်၏ ရုပ်ကလာပ်ကို ဘိုင်ဇန်တီယမ်မြို့သို့ ရွှေ့ပြောင်းပြီး အချိန်အနည်းငယ်တွင် နာတာလီယာ၏ ရုပ်အလောင်းကိုလည်း ခင်ပွန်း၏ ဂူဗိမာန်ထက်တွင် လဲလျောင်းနေသည်ကို တွေ့ရှိကြရသည်။ နာတာလီယာသည် ခင်ပွန်းသည်၏ ဂူဗိမာန်ကို စောင့်ရှောက်ရင်း သေဆုံးသွားခြင်း ဖြစ်လေသည်။
အေဒရီယန်၏ စွန့်လွှတ်ပေးဆပ်မှုသည် ၁၈ ရာစုတည်းကပင်ရှိ၍ ယနေ့တိုင်အောင် စံနမူနာထားခြင်း ခံရသည်။ ထိုကာလများတွင် အေဒရီယန်ကို စစ်သည်တော်များကို စောင့်ရှောက်သည့် သူတော်စင် (patron saint) ဟူ၍ ခေါ်ဆိုကြလေသည်။
မေတ္တာသည် စိတ်ရှည်တတ်၏။ ကျေးဇူးပြုတတ်၏။ မေတ္တာသည် ဂုဏ်ပြိုင်ခြင်းမရှိ၊ မာန်မာနမရှိ။ မလျောက်ပတ်စွာ မကျင့်တတ်။ ကိုယ်အကျိုးကို မရှာတတ်၊ ဒေါသအမျက် မထွက်တတ်၊ အပြစ်ရှိသည်ဟု မထင်တတ်၊ မတရားသောအမှု၌ ဝမ်းမြောက်ခြင်းမရှိတတ်၊ သမ္မာတရား၌ ဝမ်းမြောက်တတ်၏။ ခပ်သိမ်းသောအရာကို ဖုံးအုပ်တတ်၏။ ခပ်သိမ်းသောအရာကို ယုံတတ်၏။ ခပ်သိမ်းသောအရာကို မျှော်လင့်တတ်၏။ ခပ်သိမ်းသောအရာကို သည်းခံတတ်၏။ (၁ကော ၁၃း၄-၇)
အပိုင်း (၈) ဆက်ရန်
