သမ္မာတရားကို အဘယ်ကြောင့် ရှာဖွေရပါသနည်း
ယေရှုကို ကိုးစားသူ - ဒီစီ တော့
ဘာသာပြန် - KiM
ခရစ်ယာန်တစ်ဦး ဖြစ်လာရခြင်း၏ ပုဂ္ဂိုလ်ရေးရာ တော်လှန်ခြင်းသည် စစ်မှန်သော လွတ်လပ်ခြင်းနှင့်အတူ စစ်မှန်သော အသက်တာပြောင်းလဲခြင်းဖြစ်သည်။ နှုတ်ကပတ်တော်နှင့် နိုင်ငံတော်သည် ထာဝစဉ် တည်တံ့၍ ထိုအရာများကို မြည်းစမ်းသောသူတိုင်း၏ အသက်တာသည် ဝိညာဉ်တော်၌ နုပျိုလန်းဆန်းနေပေလိမ့်မည်။ သမိုင်းတလျှောက် ကြီးကျယ်ခမ်းနားသော ပြောင်းလဲခြင်းများကို လုပ်ဆောင်ရာတွင် သမ္မာတရားကို ဆာလောင်မွတ်သိပ်သူ၊ ယုံကြည်ခြင်းတရားကို ရိုးရှင်းစွာ လိုက်နာကျင့်ကြံခြင်းမပြုဘဲ ဘုရားသခင်ကို အမှန်တကယ် ရင်းနှီးကျွမ်းဝင်ပြီး စစ်မှန်သော ဗျာဒိတ်တော်ကို မျှော်လင့်တောင့်တသူ စသည့်ပုဂ္ဂိုလ်များကသာ ပြောင်းလဲခြင်းကို လုပ်ဆောင်နိုင်ကြလေသည်။ ထိုသို့သော ယုံကြည်မှုမျိုးထက် မလျော့သော ယုံကြည်ချက်ရှိသူများသာ ကမ္ဘာကြီးကို ပြောင်းလဲစေသူများ ဖြစ်လာကြပါသည်။
သင်တို့လည်း ငါ့ကို အဘယ်သူဖြစ်သည် ဆိုကြသနည်းဟု မေးမြန်းတော်မူလျှင် ရှိမုန်ပေတရုက၊ ကိုယ်တော်သည် ခရစ်တော်တည်းဟူသော အသက်ရှင်တော်မူသော ဘုရားသခင်၏သားတော် ဖြစ်တော်မူသည်ဟု လျှောက်လေ၏။ ယေရှုကလည်း၊ ရှိမုန်ဗာယောန၊ သင်သည် မင်္ဂလာရှိ၏။ အကြောင်းမူကား၊ အသွေးအသားသည် ဤအကြောင်းအရာကို သင့်အား ဖော်ပြသည်မဟုတ်။ ကောင်းကင်ဘုံ၌ ရှိတော်မူသော ငါ့ခမည်းတော်သည် ဖော်ပြတော်မူသတည်း။ ငါဆိုသည်ကား၊ သင်သည် ပေတရုဖြစ်၏။ ဤကျောက်ပေါ်မှာ ငါ့အသင်းကို ငါတည်ဆောက်မည်။ ထိုအသင်းကို မရဏနိုင်ငံ၏ တံခါးတို့သည် မနိုင်ရာ။ (ရှင်မဿဲ ခရစ်ဝင်ကျမ်း ၁၆း၁၅-၁၈)
ယေရှု ထိုနေရာ၌ မိန့်ကြားတော်မူသော ကျောက်သည် ပေတရု ဖော်ပြသည့်အတိုင်း ယေရှုသည် ခရစ်တော်ဖြစ်သည်ဟူသော ဗျာဒိတ်တော်ကို ဆိုလိုခြင်းဖြစ်သည်။ ယေရှုသည် ဘုရားသခင်၏ ဘိသိက်ခံ သားတော်ဖြစ်သည်၊ ယေရှုသည် လူသားတိုင်း၏ အရှင်သခင်နှင့် ကယ်တင်ရှင်ဖြစ်သည်ဟု ဆိုလိုခြင်းပင် ဖြစ်သည်။ ထိုကျောက်ဆောင်ပေါ်တွင် ယေရှုသည် ကိုယ်တော်၏ အသင်းတော်ကို တည်ဆောက်သည်။ ဗျာဒိတ်တော်မရှိလျှင် ဧဝံဂေလိတရား၌ ရှိသော ကြွယ်ဝခြင်းအကြောင်းကို မသိရှိနိုင်သောကြောင့် အခွင့်အာဏာနှင့် ရာထူးကို ရှာဖွေတတ်သော ထူထောင်ပြီးသား အသင်းတော်ရှိ သင်းဝင်များပင်လျှင် လမ်းလွဲကြပေမည်။
အပိုင်း (၃) ဆက်ရန်
