နေရောင်လင်းလက်စွာတောက်ပနေတဲ့ ညနေခင်းတခုဟာ လှပစွာသာယာလို့နေပါသော်လည်း တခဏချင်းတွင်ပင် မိုးဖွဲလေးများကျလာလေရဲ့။ ဒီလိုနဲ့တဖြေးဖြေးနှင့် ဒီမိုးတွေဟာ ပိုသည်းလို့လာခဲ့ပါတယ်။ နေကတော့ပူလို့ကောင်းနေတုန်းပင်။ နေပူသော်လည်းမိုးရွာနိုင်တယ်၊ မိုးအုံ့သော်လည်း မိုးမရွာခြင်း စသဖြင့်ဖြစ်နိုင်ပါတယ်ဆိုတာကို နားလည်ရပါတယ်။
ဒီလိုပါပဲ မိမိတို့ရဲ့အသက်တာမှာ ဘုရားသားဖြစ်လို့ ဒုက္ခဆင်းရဲတွေခက်ခဲမှုတွေမရှိတော့ဘူး၊ ဘုရားသားက အောင်မြင်ရမယ်၊ ချမ်းသာရမယ်၊ ကျန်းမာရမယ်ဆိုသည်မှာ နေပူပူထဲတွင် မိုးမရွာနိုင်ဘူးလို့ဆိုနေသလိုပင် ဖြစ်နေတတ်ပါတယ်။ ဆိုကြပါစို့ အကယ်၍သာ နေပူနေလျှင် မိုးလုံးဝမရွာဟုသိမှတ်ထားလျှင် ထိုနေပူချိန်မှာ မိုးရွာသောအချိန်တွင် ထိုသူသည် အံ့ဩမှင်သက်နေမည်သိပ်တော့ သူ့အတွက်ပြဿနာမရှိပေ၊ ခဏတာကြောင်ကြည့်နေရုံသက်သက်ဆိုသော်လည်း ဘုရားသားဟုဆိုသောသူသာ ဒုက္ခဆင်းရဲတွေကြုံရင်၊ မကျန်းမာရင် ဘုရားသားမဟုတ်တော့သလိုခံစားရကာ လမ်းလွဲသွားစေနိုင်ပေမည်။
ထိုကဲ့သို့ပင် မိုးအုံ့နေတိုင်း မိုးရွာရမည်လို့သတ်မှတ်သလိုသာ ဆင်းရဲခြင်း၊ မကျန်းမာခြင်း၊ ဒုက္ခရောက်ရခြင်း စသဖြင့်တွေသာ ကြုံရတိုင်း ဘုရားသားမဟုတ်ဘူးလို့ သတ်မှတ်လျှင် ထပ်မံ လမ်းလွဲသွားနိုင်ပေမည်။အနည်းငယ်သော ဗဟုသုတသည် လူကိုအန္တရယ်ပေးနိုင်သည်ဟုဆိုသကဲ့သို့ပင် ဘုရားသားဖြစ်တိုင်း ကျန်းမာရမှာလား၊ အောင်မြင်ရမှာလား၊ ဆင်းရဲနေရင်ရော ဘုရားသားမဟုတ်တော့ဘူးလား၊ မကျန်းမာရင်ရော ဘုရားသားမဟုတ်တော့ဘူးလား။ ဘုရားသားဆိုတာ ထိုအခြေအနေတွေနဲ့သက်ဆိုင်နေသလားဆိုတာကို ကျွန်တော်တို့ယုံကြည်သူ ခရစ်ယာန်တွေဟာ ဆင်ခြင်မိဖို့အရမ်းအရေးကြီးပါတယ်။
ယောဘရဲ့အသက်တာကိုကြည့်ရရင် သူ့ပစ္စည်းဥစ္စာအကုန်လုံးနေ့ချင်းတွင် ဆုံးရှုံးသွားသလို၊ သားသမီးတွေသေ၊ အနာစိမ်းတွေပေါက်၊ တနည်းအားဖြင့် မအောင်မြင်ဘူး၊ ဒုက္ခဆင်းရဲရောက်တယ်၊ မကျန်းမာဘူးဖြစ်တယ်။ သူ့ကိုယသူ့ သူငယ်ချင်းတွေကကြည့်ပြီး ဘုရားနဲ့မမှန်လို့ဆိုပြီးတောင် အထင်လွဲတယ်ဆိုတာကိုတွေ့ရပါတယ်။ လက်ရှိအမြင်နဲ့ပြောနေကြအတိုင်းပြောရရင်တော့ အဲ့ကောင်ကို ဘုရားရိုက်တာ၊ ဘုရားမကြိုက်တာလုပ်လို့ဒုက္ခတွေတန်းဆီပြီးရောက်နေရတာလို့ဆိုကြပါစို့။ သို့သော် သူဟာ ဘုရားသခင်နှစ်သက်သောသူဖြစ်တာကိုတွေ့ရတယ်။ ကျွန်တော်တို့တွေဟာ ယောဘကဲ့သို့ ကြုံတွေ့ရရင်တောင်မှ ဘုရားသခင်ကို မပြစ်မှားသောသူ၊ သစ္စာရှိစွာ ကိုးကွယ်သောသူများ ဖြစ်စေကြဖို့ရာလိုအပ်ပါတယ်။
ယောဘရဲ့သူငယ်ချင်းတွေ အမြင်မှာတော့ ကောင်းစားနေတယ်၊ ကျန်းမာတယ်။ သို့သော် ဘုရားသခင်သူတို့ကို မနှစ်သက်တာကိုတွေ့ရပါတယ်။ ယောဘတောင် သူတို့ကိုယ်စားဘုရားသခင်ကို တောင်းပန်ပေးရတယ်ဆိုတာကိုတွေ့ရသောကြောင့် မိမိတို့၏ အမြင်နှင့်အထင်သည် လွဲနေတတ်ပေသည်။
ဒါကြောင့် နေပူပူတွင် မိုးရွာတတ်သလို၊ မိုးအုံ့တိုင်းလည်း မိုးမရွာတတ်သည်ကို သိမှတ်ကာ ဩဝါဒများကို ပိုင်းခြားနားလည်တတ်သောသူများဖြစ်ကြဖို့ရန် အနည်းငယ်ဝေမျှ ခွန်အားပေးလိုက်ပါတယ်။
ယောဘဝတ္တု၁:၂၂
ယောဘသည် ဤအမှုများနှင့် တွေ့ကြုံသော်လည်း မမှားယွင်း။ ထာဝရဘုရားကိုလည်း အပြစ်မတင်ဘဲ နေ၏။
ဘုရားရှင်ဆက်လက်စကားပြောပါစေ။
Titus Kyaw Nyi
